ROXAS CITY – Padayon ang validation sang composite team sang Roxas City government sa mga puluy-an sang mga residente sang syudad nga totally damaged sang naglaslas ang bagyo Ursula sang nagligad nga tuig.
Ginpahayag ni Mr. Gilbert Fernando, City Disaster Risk Reduction and Management Officer II nga sa walo ka adlaw nga pagpatigayon nila sang validation may 23 na sila ka mga barangay nga napadulungan.
Sa 3mil 530 ka mga balay nga ginpa-record nga totally damaged, nagaguwa sa ila validation nga 749 ang totally damaged samtang ang 485 nga gin-record nga totally damaged ang na-classify nga partially damaged lamang.
Ginpanindugan ni Fernando nga ila ginsunod ang pagsulundan sang DSWD sa pag-classify sa totally damaged nga mga balay.
Ginpahayag pa sini nga may 15 diyas nga ginhatag sa ila si Mayor Ronnie Dadivas agud tapuson ang pag-validate sang mga totally damaged shelters.
Nahibaluan nga matapos ang ila validation sa barangay, ini ang iga-endorso sa DSWD.
Samtang indi pa makahatag sang pat-ud nga sabat si Fernando kun ano nga assistance ukon bulig ang mabaton sang mga pumuluyo nga nagub-an sang ila mga balay bangud tsekyaron pa ini sang alkalde kag ila pa estoryahan kun ano nga ayuda ang mahatag sa mga apektado nga mga residente.
