ROXAS CITY – Ginpalab-ot sang pila ka mga senior citizen ang ila pamangkutanon sa Commissioner sang National Commission of Senior Citizens, pinaagi sa programa sang Bombo Radyo.
Suno kay Mr. Ernesto ‘Erning’ Limjuco, presidente sang Office of the Senior Citizen (OSCA) sa Roxas City, naluoy ini sa mga kapareho sini senior citizen nga nagabalik-balik sa ila opisina agud magpamangkot kun san-o ang mga ini makabaton sang pension.
Dugang pa sini, nga nagkalamatay lang ang pila ka mga aplikante sa amu nga programa, wala gid sila makasulod.
Isa pa sa ginpalab-ot sini nga may mga yara sang Senior Citizen nga nagabaton sang social pension, apang mga pensyonado man sa SSS ukon GSIS.
Ginsuhestiyon man sang isa ka caller sa programa, nga tsekyaron sang Komisyon, ang mga senior citizens kada barangay kag pila ang nagabaton, bangud sa iya obserbasyon kun malapit sa luwag apisar nga bag-o lang nag 60-anyos, gilayon nga ginapasulod, apang ang malayo sa luwag, apisar nga 80-anyos na ini, indi gid makasulod sa amu nga programa.
Pabor man ini sa opinyon sang pila ka katigulangan nga imbes dugangan ang kantidad sang pension, dugangan nalang ang numero sang mga pensioner.
Aminado si Mr. Edwin Espejo, Commissioner sang National Commission of Senior Citizens nga madamo sang mga reklamo nga nababaton ang ila talatapan angut sa pagpasulod sang mga katigulangan sa social pension sa mga senior citizen nga programa sang Department of Social Welfare and Development (DSWD). Apang, suno diri, nga DSWD ang nagadeterminar sang pondo.
Nagalaum ini nga posible sa masunod nga binulan ukon tuig, iga-transfer na sa ila sa Commission of Senior Citizen ang ini nga programa, agud ilabi nga matutukan ang mga concern sang mga katigulangan kag mahitso ang kwalipikasyon sa nasambit nga programa.
