ROXAS CITY – Kumpyansa ang kongresista sa premier distrito sang probinsiya sang Capiz nga daku ang mabulig sang gin-aprubahan nga Urgent bill sang Senado kag House of Representatives nga nagahatag sang emergency powers kay President Rodrigo Duterte para mapakigbatuan ang krisis nga ginapangatubang sang Pilipinas sa COVID-19.
Ginpahayag ni Congressman Emmanuel ‘’Tawi’’ Billones nga 284 ka mga kongresista ang nagboto pabor sa amo nga hagna samtang 9 ka mga kongresista ang wala nagpabor diri.
Suno sa kongresista nga gin-adoptar lamang sang Kongreso ang bersyon sang Senado, agud wala na sang bicamel conference committee nga matabo kag gilayon na nga mapirmahan sang Presidente ang hagna kag mangin epektibo ini.
Gin-athag man sang kongresista nga nagboto ini pabor sa amo nga hagna, agud mahatagan sang emergency power ang presidente kag maaksyunan kag matapna ang epekto nga dala sang COVID-19 sa Pilipinas.
Kalakip sa kaundan sini ang cash financial assistance para sa 18 ka milyon nga mga pamilya nga naapektuhan sang COVID-19 pandemic sa diin magabaton sang P5,000 tobtob P8,000 nga ayuda ang kada pamilya.
