ROXAS CITY – Mismo si Capiz 1st district congressman Emmanuel ‘Tawi’ Billones Sr. ang nagpatawag sa district engineer kag contractor sang road concreting/rehabilitation project sang Department of Public Works and Highways (DPWH) sa Barangay Cagay, Roxas City agud hibaluon ang estado sang amo nga proyekto.
Ini ang ginpahayag sang kongresista sa exclusive interview sang Bombo Radyo.
Suno kay Billones nga sa pinakaulihi sini nga pagpauli sa probinsiya, siya man ang may personal nga eksperyensiya sa houl nga tuga sang amo nga proyekto.
Bangud diri suno kay Billones nagpangusisa siya natuhoy sa estado sang ginakaayo nga karsada sa lugar.
Diri kag iya nga ginhambalan ang district engineer kag kontraktor nga kun mahimo mapadasig na ang pagtapos sa amo nga proyekto bangud madamo na sang nagawangal nga pumuluyo kag motorista bangud sa tuman ka gutok nga trapiko.
Indi lamang ang Barangay ang apektado suno kay Billones kun di mangin ang kaiping sini nga mga kabaranggayan kapareho sang Barangay Libas kag Dayao.
Suno kay Billones nga iya ginhambalan ang district engineer kag kontraktor nga tapuson ang rehabilitasyon sang karsada antes magtakop ang bulan sang Nobyembre.
Apang ginpahayag sang opisyal nga indi man mabasol ang district engineer kag kontraktor kun maatrasar ang konstruksiyon sang karsada bangud sa malain nga lakat sang panahon.
Gindugang pa ni Billones nga may pila pa ka mga road-reblocking projects sa iban nga kabanwahanan sa premier distrito sang probinsiya.
Ini tanan suno kay Billones ang ginahingagaw nga matapos sini nga tuig 2019 agud mapuslan ang pondo sang DPWH kag indi na mabalik sa gobyerno-nasyunal.
