ROXAS CITY – Nagapati ang kongresista sa premier distrito sa probinsiya sang Capiz nga daku ang advantage ni Congressman Martin Romualdez sang Leyte nga mangin House Speaker kun wala lamang nagpatunga si President Rodrigo Duterte sa house speakership post.
Sa interview sang Bombo Radyo Roxas kay Capiz 1st District Congressman Emmanuel ‘’Tawi’’ Billones Sr., ginpahayag sini nga daku ang tsansa ni Romualdez nga makuha ang pinakamataas nga pwesto sa Kongreso bangud suportado ini sang madamo nga political parties.
Kalakip sa madamo nga partido sa manubo nga panalgan sang Kongreso nga nagpahayag sang suporta sa kongresista, amo ang grupo ni Congresswoman Gloria Macapagal Arroyo, Imelda Marcos, Capiz 2nd District Congressman Fredinil Castro sang NUP kag iban pa.
Apang bangud sa pagpasilabot sang presidente sa nangin kontrobersyal nga house speakership race, gin-areglo sini ang tanan kag ginhimo nga Majority Floor Leader si Romualdez samtang may term sharing naman sanday Taguig-Pateros district Representative Alan Peter Cayetano kag Marinduque Representative Lord Alan Velasco.
Apang posible suno kay Billones nga nagpasugot si Romualdez nga mangin majority floor leader, bangud isa man ini sa ginakabig nga powerful position kag ikaduha sa pinakamataas nga posisyon sa Kongreso.
