Fake news ang nagalapta nga report nga indi pagtapuson sang kongresista sa premier distrito sang Capiz ang ika-tatlo nga termino sini bangud magapadalagan ini bilang gobernador sang probinsiya sa maabot nga eleksyon sa tuig 2022.
Ginpahayag ni Capiz 1st District Congressman Emmanuel Billones Sr., nga wala sang kamatuoran ang nagalagaw nga balita bangud handum sini nga tapuson ang ikatatlo nga termino bilang kongresista sang premier distrito sang Capiz.
Sa pagkamatood nga mismo si anay DILG Secretary Mar Roxas ang luyag nga tapuson sini ang iya termino bilang kongresista.
Apang kun may iban nga indi magpati sa iya ginbuy-an nga pahayag suno kay Billones ang sarang maka-verify sini nga statement kay Roxas agud ila makumpirma ang kamatuoran nga tapuson sini ang termino bilang kongresista sang premier distrito sang Capiz.
Suno pa kay Billones nga wala man ini sang nahibaluan ukon nabatian sa ila partido nga may nagpabutyag sang intensyon ukon nagpakita sang interes nga magpadalagan bilang congressman.
Apang aminado ang opisyal nga matunog ang mga pangalan nanday 2nd District Congressman Frediil Castro, anay Roxas City Mayor Alan Celino,Vice Governor Jaime Magbanua kag anay Governor Antonio del Rosario nga magapadalagan bilang gobernador sag probinsiya.
Nahibaluan nga aktibo sa gihapon si Roxas sa pagpili sang mangin official candidate sang partido Liberal sa probinsiya sang Capiz sa May 2022 elections sa diin ginahimo sini ang tanan agud masiguro nga magustuhan sang mga Capizeño ang kadidato nga iya mapilian.
Dapat ini ang may kapasidad, integridad, dignidad kag sensiro sa pagserbisyo sa mga pumuluyo.
Samtang suno kay Congressman Billones bilang pinakamataas nga elected LP member sa Capiz sa iya nagaagi ang tanan nga komunikasyon sang ila partido.
