ROXAS CITY – Nagapati ang kadam-an nga mga Kongresista nga mas makapamaayo nga ipaiway ang Barangay kag SK Elections, sa Disyembre 2023.
Ini ang ginpahayag ni Capiz First District Congressman Emmanuel ‘Tawi’ Billones, sang mainterview sang Bombo Radyo.
Suno diri, mas maayo nga ipaiway ang eleksyon bangud bag-o pa lamang natapos ang national kag local elections, gani para sa ila nga Kongresista, ginapanan-aw pa sang bag-o nga administrasyon ni President Ferdinand Marcos Jr. ang mangin maayo nga pagpadalagan sa Barangay.
Aminado man si Billones nga sa iya paglibot sa mga kabarangayan sa Capiz, madamo ini sang nababatian nga komento sang pumuluyo nga pabor nga madayon ang eleksyon sang Barangay kag SK sa Disyembre 2022, bangud sa pila ka reklamo sa ila Barangay officials.
Matandaan nga pinaagi sa boto nga 264 (pabor)-6-(indi pabor)-3 (abstain), natigayon nga mapapasar sa ikatatlo kag katapusan nga pagbasa ang House Bill No. 4673 ukon ang postponement sang Barangay kag SK Elections.
Sa karon, ginatugyan na ni Billones kag sang Kongreso kay President Marcos Jr., kun pagapirmahan sini ang ila ginpapapasar nga resolusyon, kun sa pagtan-aw sang presidente nga makabentaha ini sa pungsod kag sa mga pumuluyo.
