Indi kumbinsido ang isa ka constitutional law expert nga makuha ang kinahanglanon nga two-thirds vote ukon kabug-usan nga 16 ka boto sang mga senador-judge agud mapamatbatan si Bise Presidente Sara Duterte sa nagapadayon nga impeachment trial.
Sa interview sang Bombo Radyo kay Atty. Joenar Pueblo, presidente sang Philippine Arbitration Center sa Visayas, iya ginpahayag nga isa ka dako nga pagpanghangkat ang pagkuha sang 16 ka boto base sa subong nga numero kag posisyon sang mga senador.
Suno kay Pueblo, mabudlay na nga makakuha sang 13 ka boto, gani suno sa iya, mas mabudlay pa gid nga magdugang sang tatlo pa ka mga senador agud malab-ot ang kinahanglanon nga 16 ka boto para sa conviction.
Matandaan nga sa una nga adlaw sang impeachment trial, ginpahayag ni Senate elected presiding officer nga si Senator Francis ‘Chiz’ Escudero nga sandig sa Konstitusyon, kinahanglan ang two-thirds nga boto ukon 16 ka boto sang 24 ka senador-judges agud ma-convict ang isa ka opisyal nga yara sa idalom sang impeachment.
Dugang pa ni Pueblo, mahimo nga i-refer sa Korte Suprema ang amo nga bagay kon may yara sang indi mag-ugyon sa resulta sang boto sang Senado.
Nagalaum man ang natungdan nga matapos ang impeachment trial suno sa kasuguan kag sa proseso nga gintalana sang Konstitusyon.
