Indi Kumbinsido ang isa ka Constitutional law expert sa cross-examination sang defense team sa una nga witness nga ginpresentar sang prosekusyon may kaangtanan sa ika-apat nga Articles of Impeachment batok kay Vice President Sara Duterte.
Sa interview sang Bombo Radyo kay si Atty. Carlo Ybañez , ginpahayag sini nga indi epektibo ang pagpangusisa sang defence team bangud nagtutok ini sa pagpakilala sang witness sang mga dokumento sa baylo nga usisaon ang kaundan sini.
Gin-athag sang abogado nga wala sang personal nga ihibalo ang witness sa mga dokumento nga ginpresentar sang depensa, gani indi ini ang husto nga tawo nga magapamatuod ukon mag-disprove sang nasaad sa nasambit nga mga dokumento.
Suno kay Ybañez, mas nagakabagay kuntani kun ginpresentar na lang sang depensa ang nasambit nga mga dokumento sa ila kaugalingon nga mga testigo kun sila ang magapresentar sang ila mga ebidensya.
