Nagapati ang isa Constitutional Law expert kag Presidente sang Philippine Arbitration sa Visayas nga bisan ano pa ang mga pahayag sang personalidad nga nalakip sa impeachment issue, ang pinal nga desisyon yara sa gihapon sa mga kamot sang mga senator-judges.
Ini kasunod sang pahayag ni Vice President Sara Duterte nga, “I can hire a gunman for P5,000,” kag sang iya pamangkot kon amo lang gid bala kabarato ang kabuhi ni Presidente Ferdinand Marcos Jr. kag sang iya pamilya.
Sa interview sang Bombo Radyo kay Atty. Joenar Pueblo, iya ginpahayag nga ang mga senador nga nagaserbe bilang judges sa impeachment trial ang may katungdanan sa paghimo sang pinal nga desisyon base sa ila pagtan-aw sa kaso.
Suno kay Pueblo, ang impeachment trial nagakinahanglan sa gihapon sang 16 ka boto pabor gikan sa mga senator-judges agud ma-impeach ang bise presidente.
Ginpahayag man sini nga sa subong nga sitwasyon sang impeachment trial, daw mas ginahatagan importansya ang numero sang mga magaboto-pabor nga mga senator-judges kaysa sa mga ebidensiya nga ginapresentar sa kaso.
