Nagapati ang isa ka Constitutional Law expert nga isa ka tactical move sang prosecution ang desisyon nga indi na pagpadayonon ang tatlo sa apat ka articles of impeachment batok kay Vice President Sara Duterte.
Sa interview sang Bombo Radyo kay Atty. Joenar Pueblo, constitutional law expert kag presidente sang Philippine Arbitration sa Visayas, iya ginpahayag nga paagi sini, mas matutukan sang impeachment court ang Article II ukon ang alegasyon sang unexplained wealth.
Suno kay Pueblo, isa sa posible nga katuyuan sang papaiway amo ang pagpasiguro nga madeterminar ukon madisesyunan ang impeachment case antes matapos ang tuig 2026.
Ginpahayag man sini nga palamangkutanon man ang pag-withdraw sang tatlo ka articles nga ang prosecution mismo ang nag-file.
Lakip diri ang Article I nga may kaangtanan sa confidential funds, Article III kaangut sa bribery, kag Article IV nga may kaangtanan sa grave threats.
Samtang, ang Article II na lamang nga may kaangtanan sa unexplained wealth sa Statement of Assets, Liabilities and Net Worth ukon SALN, ang padayon nga tutukan sang prosecution.
