Sarado ang talatapan sang construction division sang DPWH Capiz 1st Engineering District matapos isa ka empleyado ang nagpositibo sa COVID-19.
Ginpahayag ni Engr. Julius Abela, head sang nasambit nga dibisyon agud masiguro ang kondisyon sang ila lawas kag pagsunod sa rekomendasyon sang City Health Office sila nga 22 ka mga empleyado ang nagpaidalum sa swab test.
Suno sa opisyal nga Abril 19 sang nagpadulong sa Iloilo ang ila kaupod sa trabaho kag sa pagbalik sini naglain ang iya pamatyag gani wala na ini nagsulod sa talatapan.
Matapos nagpositibo sa COVID-19 ang amo nga empleyado, gindala na ini sa Temporary Treatment and Monitoring Facilities sa Capiz gym agud magpaidalum sa quarantine.
Gindugang pa ni Abela nga matapos nagpa-swab test nagpauli sila nga mga empleyado agud magpaidalum sa home quarantine kag hulaton ang resulta sang nasambit nga test.
Nahibaluan nga tobtob sa Mayo 5, 2021 ang ila quarantine period santu man sa rekomendasyon sang CHO.
Bukas ang iban nga mga talatapan sa DPWH bangud wala sila naka-close contact sa empleyado nga nagpositibo sa COVID-19.
Samtang sumugod subong nga adlaw pagabuksan na ang dalan Legaspi sa Ellieta-Atila Balgos st., agud mapadasig ang implementasyon sang reconstruction activities..
Pag-abot naman sa kontrobersiyal nga dalan sa San Roque, suno kay Abela nga manugtapos na ini kag pila na lamang ka mga drainage system ang ginakaayo.
Posible nga sa Hunyo 15, 2021 matapos na ang ini nga dalan.
