ROXAS CITY – Karsel sang Pontevedra Municipal Police Station ang gindangatan sang 26 anyos nga construction worker matapos nga maaktuhan nga tuyo kuntani kawaton ang isa ka motorsiklo sa Barangay Bailan sang nasambit nga banwa.
Sandig sa inisyal nga imbestigasyon sang Pontevedra Municipal Police Station, mismo ang biktima nga si Mark Vicson Dela Cruz, 32 anyos kag residente sang nasambit nga lugar ang nakakita nga ginatulod na palayo sang suspek nga si Elvie Basilonia, 26 anyos sang Sitio Naurok Barangay Bantigue, Panay ang Suzuki Hooper nga motorsiklo sang biktima.
Madasig naman nga nagpangayo sang bulig ang biktima sa mga opisyales kag tanod sang barangay apang gilayon nga nagpalagyo ang suspek.
Natigayon naman nga madakpan ang suspek kag temporaryo nga gindala sa talatapan sang pulisya.
