Pilas ang naangkon sang isa ka construction worker matapos nga gin-buno sang iya kaupod man sa trabaho sa Sitio Andrada, Barangay Banica, Roxas City.
Ginkilala ang biktima sa kay alyas “Jake”, 23-anyos, construction worker, samtang ang ginatudlo suspek ang ginkilala kay alyas “Joel”, yara sa legal nga pang-edaron, pakaduwa sang biktima kag lunsay mga residente sang Sitio Agbalagon, Barangay Jaena Norte, Jamindan, Capiz.
Ginkilala man ang witness kay alyas “Mark”, 25-anyos, kaupod man sa ubra kag residente sang Barangay Pangabuan, Jamindan, Capiz.
Sa pagpakig-angut sang Bombo Radyo kay PCMS Ramil Arcangeles, Spokesperson sang Roxas City Police Station, ginpahayag nga antes pa man magluntad ang amu nga insidente, magkaupod ang tatlo nga naga-inom-inom sa Barangay Punta Cogon, Roxas City.
Sandig sa panaysayon sang witness nga si alyas “Mark” matapos sila nga nag-inom-inom nauna pauli ang suspek sa ila nga staff house, antes paman sila nagpauli sang biktima.
Apang, nauna ini sa pagsulod sa ila ginadayunan kag ginkakibot nalang nga may nagluntad na nga mainit nga komosyon sa tunga sang biktima kag sang suspek.
Bangud sa komosyon, pilas sa wala nga liog ang naangkon ni alyas “Jake” kun sa diin ginapatihan nga ginbuno ini sang ginatudlo suspek nga si alyas ‘Joel”.
Gilayon ini nga gintambagan kag ginbulong ni alyas “Mark” ang naangkon nga pilas ni alyas “Jake” pinaagi sa paghatag sang first aid antes paman ini ginpadangat sa ospital sa syudad sang Roxas.
Madasig naman nga nakapalagyo ang ginatudlo suspek matapos nakumiter ang amu nga krimen.
Mahibaluan nga yara sa impluwensya sang makahulubog nga ilimnon ang magtimbang nga bahin.
Samtang, desidido naman nga magpasaka sang kaso ang pamilya sang biktima batuk sa nasambit nga suspetsado.
Sa karon, padayon ang ginapatigayon nga imbestigaran sang mga kapulisan angut sa nasambit nga insidente samtang padayon nga ginalalip ang ginatudlo suspek.
