ROXAS CITY – Patay ang 44-anyos nga construction worker matapos ginluthang sang riding-in-tandem sa Barangay Dinginan, Roxas City.
Ginkilala ang biktima nga si Roland Divinagracia sang Barangay Sibaguan, Roxas City nga nag-angkon sang pilas sa dughan kag tagkugo.
Sa interview sang Bombo Radyo sa isa ka tricycle driver nga nakasaksi, ginpahayag sini nga ginasubay nila ang dalan kaina sang aga sang makabati sang asud asod nga lupok.
Nabatyagan na lamang sini nga ila na nakadungan ang mga suspek nga nagasakay sa motorsiklo, sa diin nakita pa nila nga may ginasukbit ang backrider nga ginapatihan amo ang nagluthang sa biktima.
Aminado ang wala ginhingadlan nga mister nga nagduha duha pa ini kun mabalik na lamang sa kahadluk nga sila ang pangtiruhon sang mga suspek.
Apang sa katapusan nadesisyunan sini nga magdiretso na lamang sa police station para ma-report ang ila nga nasaksihan.
Samtang positibo naman nga ginatudlo sang asawa sang biktima ang kaupod sa trabaho sa construction sang mister nga si John Micheal Divera bangud antes ang krimen nag-away ang suspek nga si John Micheal Divera kag ang tiyo sang biktima, sa diin ini ang nagtambag.
Posible nga ginkaakig ni Divera ang pagtambag sang biktima rason nga nagpamahog si Divera nga antes ini maglakat padulong sa Mindanao may itumba ini.
