ROXAS CITY-Nagpabalhag ang isa ka delivery boy sa Roxas City Police Station matapos nga ginaalegar ginsumbag sang isa ka construction worker sa Arnaldo Boulevard, Barangay Baybay, Roxas City.
Ginkilala ang tagreklamo nga si Benjie Estorninos, delivery boy kag residente sang Barangay Balucuan, Dao, Capiz.
Sa interview sang Bombo Radyo kay Estorninos nga nagdeliver ini sang relo nga gin-order sang suspek nga si Edgardo Pama sa isa ka online shop.
Apang, sang gintsekyar ni Pama ang gin-order sini nga relo gilayon ini nga nadismaya rason nga wala niya ini ginbaton kag wala ginbayadan.
Gintinguhaan pa kuntani ni Estorninos nga ipaistorya kuntani si Pama sa iya amo apang wala man ini nagpati sa iya.
Dugang pa sini nga naghinyo pa ang tagreklamo kay Pama nga mangayo sang incident report apang hinali na lamang ini nga ginsumbag sang amo nga suspek.
Bangud diri, ginpakamaayo na lamang sang tagreklamo nga i-report sa pulisya ang natabo kun sa diin gilayon naman nga gin-aresto sang mga pulis si Pama.
Nahibaluan nga nagalab-ot sa P1,499 ang gin-order sang amo nga suspek sa online shop.
