ROXAS CITY – Nagapadayon ang ginapatigayon nga contact tracing sa mga indibidwal nga may yara sang closed contact sa katapu sang Philippine Coastguard nga nagpositibo sa covid-19 disease sa Barangay Poblacion, Pilar, Capiz.
Base sa pahayag ni Punong Barangay Boyet Bonilla nga gilayon nga nagpatigayon sang contact tracing ang mga barangay officials sa higad sang baybay nga masami ginatiniran sang nagpositibo nga coastguard kag pila sini ka mga residente.
Gilayon man nga ginpahalin ni Bonilla ang mga nagabaligya sang mga utanon malapit sa baybay kag gilayon ginpaidalum sa disinfection ang lugar agud malikawan nga maglapta ang kagaw.
Samtang may anum naman ka mga Person’s Under Monitoring (PUMs) nga ginamonitor ang mga barangay officials nga naka-closed contact sa nagpositibo nga katapu sang Philippine Coastguard apang ginpasalig ni Bonilla nga wala man sang may nabatyag nga sintomas ang mga nasambit nga indibidwal.
Gindugang pa ni Bonilla nga hugot sa karun ang pagpatuman sang checkpoint
sa nasambit nga barangay sa diin ginapangitaan sang household quarantine pass ang mga nagasulod kag nagaguha nga mga indibidwal.
Apang ginklaro ni Bonilla nga wala pa nakalockdown ang barangay kag ginatugyan na lamang sa LGU sang Pilar ang nasambit nga tikang.
