ROXAS CITY – Nagapadayon ang ginapatigayon nga contact tracing sa mga indibidwal nga may yara sang closed contact sa 3 ka mga indibidwal nga nagpositibo sa COVID-19 sa Sitio Sakop, Barangay Culasi, Roxas City.
Ini ang ginpahayag ni City Health Officer Dr. Lory Cahilog sang mainterview sang Bombo Radyo.
Suno kay Cahilog nga ginabulubanta nga 25 tubtob 30 ka mga indibidwal nga miyembro sang pamilya sang tatlo ka mga nagpositibo ang padayon nga ginamonitor sang mga health authorities agud masiguro nga wala sang may nalatnan sa nasambit nga balatian.
Ginpahayag ni Cahilog nga magluwas sa pamilya sang tatlo nagapatigayon man sila sang contact tracing sa mga indibidwal nga nakaistorya sang mga nagpositibo.
Nahibaluan nga ginpaidalom naman sa Real-Time Polymerase Chain Reaction ukon RT-PCR test ang mga indibidwal partikular na sa malapit nga mga himata nga naka-close contact sa mga nagpositibo.
Dugang pa sini nga ang iban sa ila ginapaidalom naman sa strict home quarantine sa nasambit nga lugar.
Nagpanawagan naman ini sa mga residente nga kun mahimo magsunod na lamang sa mga nagakaigo nga mga health protocols agud nga malikawan ang pagdamo sang kaso sang amo nga balatian.
