ROXAS CITY – Nagapadayon sa karon ang contact-tracing sang mga katapo sang gobyerno sang siyudad sa mga nakahalubilo sang 47 anyos anyos nga babaye nga isa ka Returning Overseas Filipino (ROF) nga kalakip sa 10 ka mga panibag-o nga nagpositibo sa coronavirus disease (COVID-19) sa Capiz.
Ini ang ginpahayag ni Roxas City Mayor Ronnie Dadivas sang mainterview sang Bombo Radyo.
Suno sa alkalde nga Hunyo 24 nakapauli sa probinsiya ang nasambit nga pasyente kag nakapauli na sa ila balay sa Barangay Dayao matapos ang iya nga 14-day quarantine period sa Hortus Botanicus sa Barangay Milibili sa pihak nga wala pa nag-abot ang resulta sang iya nga swab test.
Matapos mag-positibo ang amo nga babaye sa nasambit nga balatian, gilayon ini nga gindala sa Roxas Memorial Provincial Hospital kag ginpadulungan ang iya pamilya agud mapa-rapid test ang iya mga naka-close contact.
Ipaidalom man sa rapid test ang mga naka-close contact sini sa mga establisyemento nga iya nga napadulungan.
Suno diri nga ginpanugyanan nga magpaidalom sa home quarantine ang mga naka-close contact sang nasambit nga pasyente kag pananglitan makabatyag sila sang anuman nga sintomas sang amo nga balatian, gilayon sila nga dal-on sa ospital kag kuhaan sang swab specimen para sa real-time polymerase chain reaction (RT-PCR) test.
Samtang, aminado ang alkalde nga matapos ang 14-day quarantine period sang mga ROF’s kag locally-stranded individuals (LSI’s) kag wala sila sang anuman nga sintomas, gilayon man sila nga ginapapauli samtang ginahulat ang resulta sang ila nga swab tests.
Indi suno diri mahimo nga palawigon pa ang ila pagtenir sa quarantine facility samtang may backlog sang test results bangud may mangin epekto man ini sa ila nga mental health.
Ginasigahom man nga mapadasig ang pagpaguwa sang laboratory test results sa oras nga mahuman na ang Containerized Relocatable RT-PCR laboratory sang gobyerno sang siyudad.
