ROXAS CITY – Nagapadayon sa karon ang contact-tracing sa mga nakasugata sang Patient 13, ang 45 anyos nga lalaki sang Jamindan, Capiz nga nagpositibo sa coronavirus disease (COVID-19) sa probinsiya.
Ini ang ginpahayag ni Provincial Health Officer Dr. Leah Del Rosario sang mainterview sang Bombo Radyo Roxas.
Suno sa opisyal, gilayon nila nga ginpanugyanan ang mga nakasugata sa amo nga pasyente kalakip na ang pamilya kag ka-trabaho sini nga magpaidalom sa home quarantine.
Gilayon man nga ginpaidalom sa pag-disinfect ang Capiz Provincial Capitol bangud ginapahayag nga isa ka empleyado sang isa ka miyembro sang Sangguniang Panlalawigan ang nasambit nga pasyente.
Sa karon, padayon nga ginabulong sa Western Visayas Medical Center sa siyudad sang Iloilo ang nasambit nga pasyente.
Mahibaluan nga ang nasambit nga pasyente ang ikaapat nga kaso sang COVID-19 positive sa Western Visayas.
