ROXAS CITY – Ginsuguran na ang contact tracing sa mga naka-close contact sa 61-anyos nga anay empleyado sang gobyerno sang syudad kag anay pinuno sang bantay dagat task force nga napatay bangud sa COVID-19.
Sa pagpakig-angut sang Bombo Radyo Roxas kay Mr. Dennis ‘’Pong’’ Saneo, head sang City Disaster Risk Reduction and Management Office (CDRRMO) nga kasunod sa pag-cremate subong nga adlaw sa bangkay sang wala ginhingadlan nga anay empleyado sang City Agriculture’s Office ang pag-lockdown sa pamilya sini sa Sitio Pagutok, Barangay Dayao.
Samtang yara na sa quarantine facility ang anak nga babaye sang biktima nga amo ang nag-asister kag nag-upod sa iya amay sang gindala sa Roxas Memorial Provincial Hospital kahapon sang aga bangud sa paglain sang iya pamatyag.
Nagsuprer sang pneumonia ang biktima kag sang ginpaidalum sa swab test nagpositibo ini sa COVID-19.
