Nagpasalig ang Department of Social Welfare and Development (DSWD) nga padayon nga makabaton sang P2,000 ang mga kwalipikado nga benepisyaryo sang Unified Package for Livelihoods, Industry, Food, and Transport (UPLIFT) program.
Ang UPLIFT assistance ang kabahin sang padayon nga tikang sang gobyerno agud mapahagan-hagan ang epekto sang krisis sa Middle East sa mga vulnerable sectors.
Sa exclusive interview sang Bombo Radyo kay DSWD Secretary Rex Gatchalian, iya ginpahayag nga katuyoan sang UPLIFT program nga maprotektahan ang 7.5 million nga mga pamilya sa pungsod.
Suno kay Sec. Gatchalian, indi luyag sang gobyerno nga bangud sa nagataas nga presyo sang mga balaklon, mas magpigado pa gid ang mga pumuluyo ukon dalayon na nga mangimol.
Pahayag niya, apisar nga may pagnubo sa numero sang mga pigado nga pamilya sa Pilipinas sandig sa data sang Department of Economy, Planning, and Development, indi dapat mangin kampante bangud nagataas pa ang presyo sang balaklon kag serbisyo.
Gani pinaagi sa UPLIFT program, siguraduhon sang gobyerno nga ang mga pamilya makabaton sang padayon nga bulig tubtob Disyembre 2026.
Ginpasalig man sang ahensya nga padayon nga naga-monitor si President Ferdinand Marcos Jr. sa sitwasyon sa Middle East.
