Ginpadangat sa ospital ang contractor nga si Pacifico “Curlee” Discaya, isa sa mga personalidad nga naulamid sa flood control scandal, sandig sa kumpirmasyon sang iya nga abogado sang Huwebes.
Sa isa ka pahayag, ginsiling sang abogado ni Discaya nga si Cornelio Samaniego III nga nakaeksperyensya sang nagkalain-lain nga balatian ang iya nga kliyente.
Ginkumpirma man ni Senate President Vicente “Tito” Sotto III, nga nagpaidalom gid man si Discaya sa MRI test bangud sa frozen shoulder.
Suno kay Sotto, malip-ot lamang ang oras sang pagpabilin ni Discaya sa ospital rason nga gilayon man ini nga nakabalik sa detention facility sang Senado matapos nga gin-examine.
Nakahunong si Discaya sa Senado umpisa pa sang Setyembre 2025 matapos ini nga ma-cite in contempt may kaangtanan sang imbestigasyon sang ginapahayag anomaliya sa flood control projects.
Si Discaya kag ang iya nga asawa nga si Sarah Discaya ang gina-angot sa pila ka construction firms nga may hawid nga mga government contract, kalakip ang pila ka mga flood control projects nga ginaimbestigaran bangud sa ginaalegar nga mga iregularidad.
Samtang, nakahunong naman si Sarah Discaya sa Lapu-Lapu City Jail.
