Nangin madinalag-on ang coronation night sang Hangaway kag Lin-ay sang Capiz 2026 nga ginpatigayon sa Capiz Gymnasium, Villareal Stadium,Roxas City.
Sa nasambit nga pageant, nagpasundayag ang 15 ka mga hangaway kag 16 ka mga lin-ay sa nagkalain-lain nga banwa kag syudad sa probinsya sang Capiz.
Nakuha ni John Lee Mabaling sa banwa sang Dao kag Katrina Camille Italia ang second runner up.
Na-secure naman ni Christian Jay Cuenca sang Roxas City kag Gennifer Zhyre Degala sang banwa sang Pontevedra ang first runner up.
Nangin bag-o naman nga Hangaway kag Lin-ay sang Turismo 2026 sanday Kirk Heinrich Gamo sang banwa sang Tapaz kag Ma. Pean Arciga sang banwa sang Sigma.
Ginkilala naman sanday Jed Michael Dailig sang banwa sang Sigma kag Aina Zelene Dullano sang banwa sang Cuartero ang titulo bilang Hangaway kag Lin-ay sang Capiztahan 2026.
Samtang, sa pagtakop sang pageant, nagpangibabaw kag ginkoronahan si Clydd Jenner Generoso sang banwa sang Dumarao bilang Hangaway sang Capiz 2026 nga nagpakita sang kaalam kag kumpyansa sa kompetisyon.
Sa pihak nga bahin, back to back win naman para sa banwa sang Tapaz matapos nakuha ni Coleen Faye Peniero ang korona bilang Lin-ay sang Capiz 2026.
Madamo naman nga pumuluyo ang nagtambong kag nagpakita sang suporta sa mga candidates sa nagkalain-lain nga bahin sang probinsya, nga naghatag sang kasadya kadungan sa pagselebrar sang Lin-ay sang Capiz 2026.
