ROXAS CITY – Plano ni City Councilor Cesar Yap Jr., chairman sang Committee on Health, Nutrition and Sanitation nga magduso sang isa ka ordinansa sa Sangguniang Panlungsod nga magadumili sa paggamit sang mga sanitents ukon sanitation tents kag pagpatigayon sang spraying ukon misting sa siyudad sang Roxas.
Ginpahayag sang konsehal nga wala pa sang pat-od nga pagtuon nga nakapamatuod nga ang disinfection kalakip ang pagpatigayon sang spraying ukon misting ang makatapna sang kagaw nga may dala nga coronavirus disease (COVID-19).
Posible pa ini suno sa konsehal nga makahalit sa tawo nga makahaklu sang kemikal nga gingamit.
Ginpahayag sini nga pinaagi sa isa ka ordinansa, mahimo nga madumilian ang pagpatigayon sini agud mapahilayo sa peligro ang ikaayong-lawas sang pumuluyo.
Gintuad pa sini sa iya nga diskurso-pribilehiyo ang insidente kun sa diin napatay ang isa ka police doctor nga si Police Captain Casey Gutierez matapos nga makahaklo sang kemikal samtang nagapaidalom sang decomtamination protocol sa quarantine facility sa Pasig City.
