ROXAS CITY – Ginbisitahan ni City Councilor Midelo Ocampo ang boarding house nga ginateniran sang mga badjao sa Barangay 9, sining syudad agud personal nga makita ang sitwasyon kag ma-estorya sila, angut sa indi maayo nga pamatasan kag ginahimo sang iban nga badjao nga nagapangayo kayu kag nagapakilimos.
Ginpahayag ni Konsehal Ocampo nga tuyo man sang iya pagpakigkita sa mga badjao, agud mapa-intiende nga indi ensakto ang ila ginahimo nga pagpangayo kayu sa diin kun indi makuntento sa ginahatag, nagapangakig kag ila pa ginatulok sang matalum ang ginapangayuan.
Suno sa opisyal nga ini nga butang ang iya ginakundenar bangud posible nga pamarisan pa sila sang mga kabataan.
Nakita man ni Ocampo ang badjao nga nagpangayo sa iya sang kuwarta, apang sang ginhatagan niya ini sang P20, naakig pa ini sa iya.
Nagpangayo naman sang pasaylo sa iya ang badjao kag nagdepensa nga nahimo lamang niya ang amo nga aktwasyon bangud sa tuman na nga kagutum nga nabatyagan.
Matapos ang paghinun-anon ni Ocampo sa mga badjao, magapakig-estorya ini kay Mayor Ronnie Dadivas kun ano ang ila sarang nga mahimo sa sitwasyon sang mga badjao nga yari sa syudad.
Samtang nagpromesa man ini nga magapadala sang bugas para may yara sang matig-ang ang mga badjao, apang antes ihatag ang bugas, luyag sini nga magpaninlo sila agud mangin matinlo ang ila palibot kag malikawan ang posible pag-angkon nila sang balatian.
