ROXAS CITY -Yara sa proseso sa paghikutar sang counter affidavit sang CEO sang 25 days double your money investment scheme nga nagapangatubang sang panumbungon nga estafa kag syndicated estafa sa Roxas City Prosecutors office kag Iloilo Prosecutors office ang legal counsel sini.
Ginpahayag ni Atty. Ferdinand Elbert Jomilla bilang legal counsel ni Junelyn Gregorio na-sentro lamang sa pagdepensa sa ginapangatubang nga mga panumbungon sang iya kliyente ang papel sini.
Suno pa sa abogado nga pareho sa handum sang mga investors nga mabalik ang ila investment, ang pagpaninguha man ni Gregorio nga mangin masulhay ang lakat sang iya negosyo kag mabalik ang investment sang mga investors.
Apang indi makahulag si Gregorio sa karon bangud detained ini sa talatapan sang National Bureau of Investigation sa Iloilo matapos nadakpan sa entrapment operation sang NBI Region 6 kaupod ang apat ka iban pa.
Nahibaluan kay Jomilla nga antes ang Pebrero 20, ang adlaw nga ginpromesa ni Gregorio sa mga investors nga magapa-pay out siya, ang natigayon nga matuman sa diin may partial pay-out sa investments sang mga investors nga natabo.
Ginapanindugan pa ni Jomilla nga inosente ang iya kliyente tobtob mapamatud-an nga may probable cause sa mga panumbungon nga ginpasaka batuk sa iya.
Gintuad pa sang abogado nga bulan pa lamang sang Pebrero nagkunsulta na sa iya talatapan si Gregorio.
Matandaan nga nadakpan sa entrapment operation sang mga katapu sang NBI region 6 sa Iloilo si Junelyn Gregorio kag ang mga kaupdanan sini sa isa ka apartment nga nagaserbe nga opisina sang iya nga negosyo.//
