ROXAS CITY – Ginpagkit sang pila ka mga magapadalagan sa nagkalain-lain nga posisyon sa gobyerno-probinsyal ang ila mga pirma sa ginhiwat nga Covenant signing para sa Secure Acurate Free/Fair Election (S.A.F.E.) sa Roxas City Plaza, subong nga adlaw sang Biyernes, Pebrero 18.
Ini nga kahiwatan ang ginpangunahan sang mga katapo sang Philippine National Police (PNP), Department of the Interior and Local Government (DILG), Parish Pastoral Council for Responsible Voting (PPCRV), Philippine Army (PA), Philippine Coast Guard (PCG), City Provincial Comelec Office kag iban pa.
Tinutuyo sini nga aktibidad amu nga mapasiguro ang seguridad sang mga kandidato kag bumuloto, ilabi na sa bahin sang PNP.
Madamo man sang mga magapadalagan sa nagkalain-lain nga posisyon ang wala nagtambong sa amu nga kahiwatan ilabi na ang grupo ni Congressman Fredenil ‘Oto’ Castro.
Apang, suno kay Mr. John Ace Azarcon, director sang DILG-Capiz, nga wala sang salabton ukon penalidad ang wala makatambong sang amu nga kahiwatan, kag kun luyag magpagkit sang ila pirma, mahimo ini sa gihapon sang mga kandidato.
