ROXAS CITY – Nakarekord sang apat ka panibag-o nga kaso sang Coronavirus Disease ukon COVID-19 sa probinsya sang Capiz.
Ini ang base sa ginpaguwa nga datos sang Capiz Provincial Health Office sang Biyernes, Hulyo 24, 2020.
Ang apat ka mga nagpositibo ang lunsay mga Locally Stranded Individuals ukon LSI’s nga ginalakipan sang 27-anyos nga babaye nga residente sang Ivisan kag nagikan sa Lapu-Lapu City, Cebu.
Ikaduha ang 64-anyos nga babaye nga residente sang Panitan kag may travel history sa Tondo City, Metro Manila.
Ikatatlo ang 31-anyos nga babaye nga residente man sang Panitan kag nagikan naman sa Makati City, Metro Manila.
Ikaapat ang 24-anyos nga lalaki nga residente sang Dumarao, Capiz kag may travel history sa Munitinlupa City, Metro Manila.
Nahibaluan nga lunsay mga Locally Stranded Individual’s ukon LSI’s ang mga nagpositibo sa nasambit nga balatian.
Sa karon, naglab-ot na sa 36 ang kabug-usan nga numero sang COVID-19 sa probinsya sang Capiz.
