ROXAS CITY – Naglab-ut na sa 106 ang kabug-osan nga kaso sang Coronavirus Disease ukon COVID-19 sa probinsiya sang Capiz.
Ini sandig sa ginpaguwa nga datos sang Capiz Provincial Health Office kun sa diin apat ka mga panibag-o nga kaso ang nagdugang sa probinsiya kahapon nga adlaw.
Una diri ang 25-anyos nga lalaki nga residente sang Barangay Punta Tabuc.
Wala sang travel history sa mga lugar nga infected sa virus kag wala man sang exposure sa suspect ukon confirmed case nga mga indibidwal sa COVID-19.
Wala man nakakadto sa high risk area sa syudad. Nahibaluan nga nagpa check up ini sa ospital matapos nakabatyag sang chronic allergic cough, hilanat kag makatol nga tutunlan. Sa karon, nagapabilin ini nga ginabulong sa Roxas Memorial Provincial Hospital ukon RMPH.
Ikaduha – 54-anyos nga lalaki nga residente sang Brgy. Cagay, Roxas City. Wala sang travel history ukon exposure sa may kaso sang COVID-19.
Nagpa-check up sa ospital matapos nga nakabatyag sang pag-ubo kag hilanat sa sulod sang napulo ka adlaw.//
Ini nga pasyenti ang naka-admit na subong sa RMPH.
Ikatatlo – 35-anyos nga lalaki nga OFW Repatriate gikan sa Qatar kag residente sang Brgy. Cagay. Nag-abot sa Roxas City sadtong Agosto 11, 2020 via Air Asia.
Nakabatyag sang pagpalanakit sang likod kag hilanat sadtong Agosto 12. Yara na ini karon sa Quarantine Facility kag wala naman sang may ginabatyag sa lawas.
Ikaapat – 10 ka-tuig nga bata nga lalaki kag apo sang COVID-19 patient nga residente sang Barangay Culasi sining siyudad nga una na na-admit sa RMPH.
Ginpaidalom naman ini sa quarantine sa Hortus Botanicus kag wala sang anuman nga ginabatyag sa lawas.
Samtang, gikan sa nasambit nga numero, 30 diri ang ginakabig nga mga active case ukon padayon nga ginabulong sa probinsiya, 73 ang nakarekober kag tatlo naman ginbawian sang kabuhi.
