ROXAS CITY – Ginabantayan sa karon ang kaso sang COVID-19 cases sa Capiz, bangud sa amat-amat nga pagdamo sang mga nagapositibo sa amu nga balatian.
Sa interview sang Bombo Radyo kay Mr. Joeffrey Espiritu, tagpamaba sang DOH-Capiz, ginpahayag sini nga ba-se sa ginpaguwa nga datos sang ahensya as of August 10, may yara sang 20 ka panibag-o nga nagpositive sa COVID-19.
Sa kabug-osan, may 112 nga aktibo nga kaso ang Capiz, 12,220 na ang nakarecover, samtang 529 ang narekord nga napatay, sumugod sang paglupok sang COVID-19 pandemic.
Sa pihak nga bahin, ginpahayag ni Espiritu nga wala sang nabalhag nga kaso sang Monkeypox sa Capiz, kag hugot nila nga ginamonitor ang points of entry sa probinsya kaangay sang pagpahamtang sang surveillance officer sa seaport ukon airport, agud may yara sang magatsekyar sa tion nga may mag manifest sang symptoms.
Ginklaro man sini lain ang Chickenpox ukon sulalob sa Monkeypox, bangud mahimo lamang ma detect ang monkeypox virus pinaagi sa isa ka test.
