ROXAS CITY – Posible nga ma-lift ukon makakas ang ginapatuman nga coronavirus disease (COVID-19) total lockdown sa United Kingdom antes ang katapusan sang bulan sang Mayo.
Ini ang base sa Bombo Radyo ni Bombo International Correspondent Reynand Dumala-on, tumandok sang Sigma, Capiz kag nagatrabaho bilang isa ka manunudlo sa Essex, England.
Suno kay Dumala-on, antes matapos ang bulan sang Mayo, posible nga dulaon na ang ginapatuman nga total lockdown sa nasambit nga pungsod.
Apang naka-depende pa ini sa gobyerno sang UK bangud may pagahimuon pa sila nga assessment natuhoy sa sitwasyon sang COVID-19 pandemic sa pungsod.
Posible suno diri nga matabo ang ‘peak’ sang COVID-19 pandemic sa UK sini nga bulan sang Abril bangud padayon sa gihapon nga nagadugang ang kaso sang amo nga balatian kag death toll sa pungsod.
Indi man suno diri malikawan nga kwestiyunon sang pila ka mga Briton kag mga eksperto ang National Health Services sa pungsod bangud wala sini ginadeklarar ang ensakto nga numero sang COVID-19 cases.
Ginapahayag nga mas manubo ang ginadeklarar sang NHS sa kabug-usan nga kaso sang COVID-19 sa nasambit nga pungsod.
