Posible nga ma-lift ukon dalayon na nga makakas ang ginapatuman nga lockdown bangud sa coronavirus disease (COVID-19) sa Estados Unidos sa bulan sang Mayo.
Ini ang base sa report ni Bombo International Correspondent Raffy Fernando sa Bombo Radyo Roxas.
Suno diri nga may tagsa-tagsa ka mga protocols ang kada-estado sa pungsod sa pagpapas sang nasambit nga balatian.
May pila ka estado suno diri nga hugot ang implementasyon sang lockdown samtang may pipila naman ka mga estado nga nagapabilin nga kalmado kag indi sang tuman ka strikto sa mga residente nga luyag magpadulong sa mga supermarkets kag essential stores kalakip na ang mga may trabaho.
Wala naman suno diri nabalaka ang mga residente sa suplay sang mga nagapanguna nga balaklon kag madamo man ang nagapalab-ot sang bulig sa food bank sang pungsod.
Nagapabilin naman nga normal ang presyo sang mga balaklon sa pungsod kag wala naman suno diri sang panic-buying nga nagakahinabo.
Bangud sa sini nga mga positibo nga mga ‘development’, posible suno diri nga dalayon na nga bawion sang gobyerno sang Estados Unidos ang ginapatuman nga lockdown sa pungsod.
