ROXAS CITY – Ginlunsyar na subong nga adlaw sang Martes ang COVID-19 vaccination sa mga kabataan nga naga-edad 5 tubtob 11-anyos.
Ang nasambit nga kahiwatan ang ginpangunahan sang Provincial Health Office kabulig ang Department of Health, kaupod ang 17 tanan ka Local Government Units sa probinsya sang Capiz.
Sa interview sang Bombo Radyo Roxas kay Mr. Jeoffrey Espiritu, Development Management Officer IV kag tagpamaba sang Department of Health (DOH)-Capiz ginpahayag sini nga target nila nga bakunahan subong nga adlaw ang 350 ka mga kabataan nagikan sa nagkalain-lain nga lugar sa probinsya.
Ginpahayag man ni Espiritu nga ang kadam-an sa mga kabataan nga nagpabakuna ang nagpa-pre-registered pinaagi sang mga eskwelahan mapa-publiko kag mapa-pribado man.
Nahibaluan nga ang bakuna nga gingamit kag pagagamiton sa nasambit nga mga edad amo ang Pfizer bangud ini gid lamang ang awtorisado sang Food and Drugs Administration.
Ginsiguro man sini nga bastante ang mga bakuna nga nag-abot sa probinsya agud mabakunahan ang mga naga edad 5 tubtob 11-anyos.
Sa kabug-usan nga 102,392 nga numero sang kabataan sa probinsya kapin 81,000 ukon 80% diri ang target sang DOH-Capiz nga mabakunahan.
Nagpanawagan man ini sa mga ginikanan nga makig-angot lang sa mga health workers agud mahibaluan kun san-o ang schedule sa pagpabakuna sang ila nga kabataan.
Ginkumbensi man sini ang mga ginikanan nga indi na magpangduha-duha pa nga pabakunahan ang ila mga anak bangud dako ang mabulig sang bakuna agud maprotektahan ang ila mga kabataan.
