ROXAS CITY-Napagkit sa banwa sang Panitan ang ika-14 nga kaso sang COVID-19 kahapon nga adlaw.//
Sandig sa ginpaguwa nga Official Statement ni Panitan Mayor Katherine Dequiña-Belo nga ang panibag-o nga nagpositibo amo ang 21 anyos nga babayi nga residente sang Barangay Capagao sa nasambit man nga banwa kag nagatrabaho bilang isa ka health worker sang isa ka pribado nga ospital sa probinsya.
Mahibaluan nga Setyembre 4 sa aga ulihi nga nakaupod sang nasambit nga health worker ang iya pamilya kag sang gab-i sa kapareho man nga petsa, na-close contact sang amo nga health worker ang kaupod sini sa trabaho nga nagpositibo sa COVID-19.
Apang sang Setyembre 10 sining tuig na lamang nakabatyag sang simtomas ang nasambit nga biktima rason nga apat ka adlaw matapos sini, nagpaidalum ini sa swab test kag nangin positibo ini sa COVID-19 sandig man sa resulta sang RTPCR Test sini.Mahibaluan nga wala sang travel history sa mga lugar nga infected sa virus ang nasambit nga biktima kag nagapabilin ini sa karon sa isa ka pribado nga ospital diri sa syudad sang Roxas para sa dugang nga pagbulong.
