Ginpakigbahin sang isa ka Certified Public Accountant Licensure Examination passer ang iya mga naagyan nga mga pagsakripisyo, pagpaninguha kag determinasyon nga nangin kabahin sang iya pag-abot sa handum nga mangin Certified Public Accountant.
Sa interview sang Bombo Radyo kay Keefe Mentino, iya ginpahayag nga indi madali ang iya gin-agyan antes makapasar sa Certified Public Accountant Licensure Examination (CPALE).
Suno kay Mentino, nagkinahanglan ini sang madugay nga preparasyon, disiplina sa pagtuon kag pag-atubang sa mga pressure nga kaangay sang review kag eksaminasyon.
Pahayag pa niya, may mga tion nga nakabatyag siya sang kakapoy kag pagduhaduha sa iya kaugalingon, apang nangin kusog sini ang suporta sang iya pamilya, mga abyan kag mga mentor nga padayon nga nagpalig-on sa iya.
Dugang pa niya, ang iya pagpasar indi lamang resulta sang iya kaugalingon nga paninguha kundi bunga man sang pagbuligay kag suporta sang mga tawo nga nagtuo sa iya ikasarang.
