Ginakabalak-an sang Commission on Population and Development (CPD) Region 6 ang pagsaka sang kaso sang mga babaye nga nagaedad 10 tubtob 14 anyos nga nagabusong sa Western Visayas.
Basi sa datos sang Philippine Statistics Authority (PSA), nakarekord ang rehiyon sang 4,867 ka adolescent births ukon pagpanganak sang mga babaye nga nagaedad 15 tubtob 19 anyos sang 2024.
Mas manubo ini sang walo ka kaso kumpara sa 4,875 nga narekord sang 2023.
Ang Probinsya sang Iloilo ang may pinakadamo nga kaso nga 2,226, ginsundan sang Capiz (866), Aklan (722), Antique (464), Iloilo City (352), kag Guimaras (237).
Sa interview sang Bombo Radyo kay Regional Director Harold Alfred Marshall sang CPD Region 6, iya ginpahayag nga kinahanglan ang mas mabakod nga paggiya sang mga ginikanan, buluthuan, kag komunidad agud maprotektahan ang mga kabataan.
Suno kay Marshall, ang mga nagapanguna nga kabangdanan sang early pregnancy amo ang kakulang sang husto nga impormasyon parte sa reproductive health kag responsableng relasyon, kag sala nga impormasyon nga posible makuha sa mga barkada ukon sa social media.
Dugang pa sang natungdan, padayon ang CPD sa pagpatuman sang nagkalain-lain nga programa kag kampanya agud malikawan ang unplanned pregnancies sa mga kabataan.
