Nagpahanumdom ang Commission on Population and Development (CPD) Region 6 sa publiko sang importansya sang responsable nga parenting kag paggiya sa pagdaku sang mga kabataan.
Sa interview sang Bombo Radyo kay Harold Alfred Marshall, Regional Director sang Commission on Population and Development Region 6, iya ginpahayag nga responsibilidad sang tanan ilabi na sang ginikanan, pamilya, eskwelahan, kag komunidad ang paggiya kag pagbulig sa mga kabataan agud mangin responsable kag may maayo nga panghunahuna.
Suno kay Marshall, bangud man sa kabudlay sang pangabuhi, madamo nga mga ginikanan ang mas nakatutok sa pagpangita sang kwarta sa adlaw-adlaw nga pagpangabuhi kag nalipatan ang paghatag sang naga-igo nga oras kag paggiya sa ila mga kabataan.
Ginpahayag man sini nga importante nga mabuligan ang mga kabataan nga mangin emotionally stable pinaagi sa maayo nga komunikasyon, suporta sang pamilya, kag husto nga pagpangatubang sa ila mga problema.
Dugang pa sang natungdan nga padayon sila nga nagakoordinar sa nagkalain-lain nga ahensya sang gobyerno agud mapasangkad pa ang mga programa para sa responsable nga parenting kag adolescent development sang mga kabataan.
