Gintalakay ang mga nagapanguna nga isyu sa kalinong kag katawhay sang syudad sa ginpatigayon nga Joint Meeting sang City Peace and Order Council (CPOC) kag City Anti-Drug Abuse Council (CADAC).
Lakip sa mga gintalakay ang pagpakamalaut sang konseho sa pagpapatay kay Jay Lavapiez.
Ginmanduan man ang kapulisan nga magpatigayon sang maid-id kag madasig nga imbestigasyon agud madali nga masolbar ang kaso kag mapanabat ang mga responsable sa krimen.
Gintutukan man sa meeting ang padayon nga kampanya sang local government batok sa ilegal nga droga kag ilegal nga sugal bilang kabahin sang tikang sa pagpreserbar sang kalinong kag seguridad sa Roxas City.
gintalakay man ang plano nga pag-establisar sang Bahay Silangan nga mangin pasilidad para sa rehabilitasyon kag pagbag-o sang kabuhi sang mga nagasurender kag naapektuhan sang problema sa ilegal nga droga.
Dugang pa, ginhatagan sang importansya ang pagpasar sang isa ka resolusyon nga naga-institutionalize sang Drug-Free Workplace Program sa Roxas City Government.
Ang tikang nagatinguha nga mapabilin nga luwas sa ilegal nga droga ang palibot sang trabaho kag mapabakod ang integridad kag disiplina sa hanay sang mga empleyado sang gobyerno.
Suno sa mga opisyal, ang mga programa kag inisyatibo nga ginhisugtan sa Joint Meeting nagapakita sang padayon nga paninguha sang local government nga mapadayon ang kalinong, katawhay kag kaayuhan sang mga residente sang Roxas City.
