ROXAS CITY – Ginklaro sang provincial director sang Capiz Police Provincial Office (CPPO) nga wala sang kamatuoran ang nagalapta nga impormasyon nga may pahanugot sini ang pagpatigayon sang ilegal nga pagpataya sang ‘bookies’ ukon illegal numbers game sa pila ka mga banwa sa probinsiya.
Ini ang ginpahayag ni Col. Canilo Fuentes sang mainterview sang Bombo Radyo.
Suno kay Fuentes, indi mahimo nga pahanugutan sini ang ilegal nga sugal sa probinsiya.
Matandaan nga humalin sang nagpungko si Fuentes bilang pinuno sang Capiz PPO, isa ang ilegal nga sugal sa iya hugot nga ginatutukan agud dalayon nga matapna sa probinsiya.
Ginklaro man sang opisyal nga wala sang kahilabtanan ang iya temprano nga pagbiya sa pwesto bilang provincial director sang Capiz PPO sa nagalapta nga impormasyon nga siya mismo ang naghatag sang pahanugot sa pagpatigayon sang illegal numbers game ukon ‘bookies’ sa probinsiya.
