ROXAS CITY – Nagdepensa si Capiz Police Provincial Office (CPPO) Director Police Colonel Julio Gustilo, Jr. angut sa reklamo sang pila ka mga opisyales sang Barangay Lonoy, Roxas City natuhoy sa ginaalegar pagsaway sini sa ila samtang nagapatigayon sang border checkpoint sa dulunan sang Roxas City kag banwa sang Ivisan.
Suno kay Gustilo nga ginpadulungan niya ang nasambit nga lugar kasunod sang pag-ulan sang mga reklamo nga ginpalab-ot sa iya natuhoy sa tuman ka strikto nga pagsulundan sa border checkpoint.
Ginpahayag sini nga gina-obligar sang mga opisyales ang driver sang mga trak ukon salakyan nga naga-deliver sang goods, essential kag non-essential products nga maka-presentar sang ila nga health declaration.
Sa iya pag-abot suno sa opisyal, nakit-an sini nga magalakat na kuntani ang driver sang isa ka delivery trak pabalik sa Iloilo para gid lamang makakuha sang health declaration.
Suno sa opisyal, ila na nga ginadula sa pagsulundan ang pag-presentar sang health declaration para makasulod bangud suno sa iya nga ‘unreasonable’ kag ‘unpractical’ ini.
Suno sa iya nga ang health declaration ang wala man nagapatimaan nga hilway na sa coronavirus disease (COVID-19) ang isa ka persona.
Magluwas diri suno sa iya, sa pagkuha sang health declaration sa mga rural health units, nagadugok pa ang tawo kag wala gina-obserbar ang social distancing policy sang Department of Health (DOH) nga dako pa nga risgo agud malatnan sang amo nga balatian.
Nagpangayo na lamang sang pasaylo si Gustilo sa mga opisyales sang amo nga barangay kun nakabungad man ini sang indi maayo nga mga tinaga sa ila pagsaway sa ila.
