ROXAS CITY – Ginpasalig sang bag-o nga pinuno sang Capiz Police Provincial Office nga hugot nga pagatutukan sang iya nga liderato ang pagpapas sang mga ilegal nga aktibidad sa probinsiya ilabi na ang ilegal nga sugal.
Ini ang ginpahayag ni Capiz PPO Dir. Pol. Col. Julio Gustilo Jr. sang mainterview sang Bombo Radyo.
Suno kay Gustilo nga luyag sini nga hibaluon kun ano ka matuod ang report nga madata sa probinsiya sang Capiz ang ilegal nga pagpataya sang ‘bookies’.
Ginpahayag sini nga magapakig-angut siya sa mga chiefs of police sa magkatuhay nga mga kabanwahanan sa probinsiya nga amo ang magatutok sa nasambit nga kampanya sa ila tagsa ka mga nasakupan nga lugar.
Suno diri nga ang sinuman nga madakpan kag mapamatud-an nga imbulbado sa nasambit nga ilegal nga aktibidad ang pagadakpon kag pasakaan sang nagakaigo nga panumbungon.
Mangin ang mga chiefs of police suno kay Gustilo nga mapaslawan nga makatuman sa ila obligasyon natuhoy sa nasambit nga kampanya ang mahimo man mapa-relieve sa pwesto kag magapangatubang sa penalidad.
Gindugang ni Gustilo nga sang nakahinala sini si Capiz governor Esteban Evan ‘Nonoy’ Contreras, partikular nga ginaapelar sa iya sang gobernador amo ang mapapas na ang anuman nga sahi sang ilegal nga aktibidad sa probinsiya.
