Hugot ang pagpatuman sang Capiz Police Provincial Office sa mga tag-iya sang negosyo kag establisyemento sa probinsya sang Capiz ang mga security measures matapos sang mga insidente sang kinawatay sa nagkalain-lain nga lugar sa probinsya.
Sa interview sang Bombo Radyo kay Police Major Rachelle Garnica, Public Information Officer sang Capiz Police Provincial Office, iya ginpahayag nga masami nga ginatarget sang mga kawatan ang mga negosyo nga may mahuyang nga seguridad kaangay sang mga wala sang CCTV cameras, kulang sa suga, kandado kag wala sang security guards.
Suno kay Garnica, ginahingyo sang kapulisan nga mag-upgrade sang ila mga security features agud malikawan ang kriminalidad.
Pahayag pa niya, mas ginapasangkad man ang police visibility deployment kag patrol operations ilabi na sa tion sang kagab-ihon.
Ginasiguro man sini nga 24/7 nga aktibo ang ila hotline numbers agud makaresponde gilayon sa mga emergency kag reklamo sang publiko.
Nagpanawagan man ang natungdan sang kooperasyon agud masiguro nga malinong kag luwas sa ano man nga sahi sang krimen ang probinsya.
