ROXAS CITY – Dismayado ang Capiz Provincial Police Office (CPPO) matapos ang luntad nga insidente kun sa diin ginaalegar ginsumbag kag gintampa sang isa ka pulis ang duha ka sibilyan sa banwa sang Dumarao sang Hulyo 2.
Ginkilala ang pulis kay PSSgt. Arnel Bucsit, imbestigador sang Dumarao MPS.
Sa interview sang Bombo Radyo kay PMaj. Ruby Magallanes, Public Information Officer sang CPPO suno diri wala ginakunsenti sang ila ahensya ang mga sala nga buluthaon sang ila miyembro kag lauman nga mangin patas ang mangin imbestigasyon.
Suno diri, nagpaguwa na sang mandu si Provincial Director PCol. Winston De belen sa hepe sang Provincial Investigation and Detection Management Unit nga imbestigahan ang insidente kun sa diin ginakalakipan ini sang duha ka mga police officer nga naka-assign sa Dumarao MPS.
Apisar indi na luyag magpasaka sang panumbungon ang duha ka biktima batuk sa naulamid nga mga pulis, kun mapamatud-an sa imbestigasyon ang sala nga ginhiwat sang opisyal magapangatubang ini sa kaso nga administratibo sa idalum sang Napolcom Memorandum Circular 2016-002.
Matandaan nga yara sa impluwensya sang makahulubog nga ilimnon si Bucsit kag si PSSgt. Antolin Sumatra bangud sini ginlihog si Brgy. Kagawad Jonel Ponsalan nga imaneho ang patrol car, kaupod si Anthony Bajada agud idul-ong ang nakainom nga mga pulis sa ila istasyon.
Apang, sang nakaabot na ang mga ini sa police station, ginaalegar gintapungol ni Bucsit dala tampa si Bajada, kag sa pagtsekyar ni Kgwd. Ponsalan, ini man ang masunod nga ginsumbag sang pulis.
Sa karon, yara sa idalum sang restrictive custody ang duha ka pulis kag ginpangbawian sang issued service firearms.
