ROXAS CITY – Ginapanindugan sang pamunuan sang Capiz Police Provincial Office (CPPO) ang pagpatuman sang istrikto nga border security checkpoint sa mga boundaries sang probinsiya sang Capiz.
Ginpahayag ni Police Col. Julio Gustilo Jr., Provincial Director sang CPPO nga ginadumilian na sa karon ang pagsulod sa probinsiya matapos nagtakup na ang ginhatag nga plaso sang gobernador sang Miyerkules sang gab-i.
Suno kay Gustilo nga ginhatagan sang tsansa nga makapauli sa Capiz ang nagaplano nga magpauli kag nagakaigo na ang amo nga tion agud makabalik sila sa ila pamilya.
Sa bahin sang kapulisan suno sa opisyal nga ginahimo lamang nila ang ila obligasyon kag nagasunod sa mandu sang gobernador agud maproteksyunan ang mga pumuluyo batuk sa ginakahadlukan nga COVID-19.
Nagahinyo lamang si Gustilo sang kooperasyon sa publiko kag sundon ang guidelines agud mangin tayuyon ang trabaho sang kapulisan kag mga health workers kag mapalayo ang mga pumuluyo sa COVID-19.
Samtang normal na nga scenario ang ila makita sa mga border security checkpoint tagsa ka adlaw nga may nagahibi, nagahinyo sa kapulisan nga pasudlon sila kag may nagaba-is.
Apang wala pa man sang mga violent reaction gikan sa mga biyahero nga nagatuyo magsulod sa probinsiya, nga hugot nga ginapamatukan.
