CAPIZ- Ginapanawagan sang Capiz Police Provincial Office sa mga Capisnon nga magtawag sa Hotline Number 911 sa tiun sang emerhensya kag gamiton ang numero sang kapulisan sa mapinuslanon nga pamaagi para makaresponde gilayon sa sulod sang lima ka minutos ang mga responder.
Suno kay Police Captain Merry Chris Dela Cruz, tagpamaba sang CPPO, mas madasig na subong malab-ot ang mga kapulisan sa kada police station bangud sa paggamit sang 911. Pinaagi sa simpleng pag-dial, madasig nga ma-deploy ang mga pulis sa lugar nga nagakinahanglan.
Dugang pa ni Dela Cruz, isa ini sa mga tikang sang kapulisan sa pagpabakod sang police visibility kag pagmintinar sang kalinong kag katawhay sa probinsya.
Target man sini ang paglikaw ukon pagbato sa bisan ano nga klase sang kriminalidad nga posible matabu.
Nahibaluan nga ang 5-minute response policy ginmandu ni PNP Chief, Police General Nicolas Torre III, bilang kabahin sang programa sa pagpaayo sang serbisyo kag seguridad sang kapulisan sa pungsod.
