ROXAS CITY –Liwat nagpahanumdum ang pamunuan sang Capiz Police Provincial Office (CPPO) sa mga police personnel sa paglikaw sa pagpalupok sang ila mga armas sini nga Paskwa kag Bag-ong Tuig.
Ginpahayag ni Police Col. Julio Gustilo Jr., provincial director sang CPPO nga liwat sini ginapalab-ot sa mga kapulisan sa paghalong sa ila mga service firearms agud malikawan ang accidental ukon indiscriminate firing bangud may nagakaigo nga sanction ukon mabug-at nga penalidad ang sin-o man nga pulis nga magalapas sa pagsulundan.
Suno sa opisyal nga magaagi sa maidid nga imbestigasyon kag proseso ang alagad sang kasuguan nga maka-komiter sang accidental firing sa amo nga mga okasyon.
Pananglitan may pulis nga mangin pasaway, ipaidalum ini sa imbestigasyon kag kun mapamatud-an nga nakakomiter sang bayolasyon posible nga ma-relieved sa pwesto ukon magpangatubang sang administrative sanction.
Magluwas diri, nagpaandam man si Gustilo sa hepe sang mga istasyon sang pulisya nga magapanabat man sila sa mangin kapaltahan sang ila nasakupan.
