Nagpanawagan ang Capiz Police Provincial Office ukon CPPO sa publiko nga gamiton ang Unified 911 emergency hotline sa tion sang emerhensya agud mas madasig ang pagresponde sang mga otoridad.
Sa interview sang Bombo Radyo kay Police Major Rachelle Garnica, Public Information Officer sang CPPO, iya ginpahayag nga paagi sa pagtawag sa 911, mas mapahapos ang pagpangayo sang bulig sa PNP, BFP, medical kag rescue services.
Suno kay Garnica, mahimo i-report sa 911 ang mga insidente kaangay sang shooting, stabbing, robbery, physical assault, vehicular accident, sunog kag iban pa nga emerhensya nga nagakinahanglan sang gilayon nga bulig.
Ginapahanumdom man sang CPPO ang publiko nga mangin responsable sa paggamit sang emergency hotline kag likawan ang prank calls kag paghatag sang sala nga impormasyon.
