Nagpanugyan ang Capiz Police Provincial Office ukon CPPO sa publiko nga likawan ang paggamit kag pag-engage sang illegal nga droga.
Sa interview sang Bombo Radyo kay Police Major Rachelle Garnica, Public Information Officer sang CPPO, iya ginpahayag nga importante ang husto nga paggiya sang pamilya agud maprotektahan ang mga kabataan kag iban pa nga miyembro sang komunidad batok sa illegal nga droga.
Suno kay Garnica, dapat likawan ang mga barkada nga mahimo magdala sa indi maayo nga bisyo.
Kon may problema man, gin-agda sang natungdan ang publiko nga maghambal sa ila mga ginikanan ukon masaligan nga tawo agud makapangayo sang bulig.
Ginpahayag man sini nga padayon ang CPPO sa pagpatuman sang mga school lecture, information campaign kag community awareness program agud ipaintindi sa publiko ang indi maayo nga epekto sang paggamit sang illegal nga droga.
