ROXAS CITY – Nakahanda na ang security plan sang Capiz Police Police Provincial Office para sa selebrasyon sang Sinadya 2019 sang Roxas City.
Ini ang ginpahayag sang tagpamaba sang Capiz PPO nga si Police Executive Master Sergeant Donna Asmod sang mainterview sang Bombo Radyo.
Ini ang kasunod man sang ginpatigayon nga send-off ceremony sa mga kapulisan kag iban pa nga mga ahensiya sang gobyerno nga magabulig sa pagpasiguro sang kalinong kag katawhay sa amo nga selebrasyon.
Ang nasambit nga send-off ceremony ang ginpatigayon sa atubang sang Roxas City Hall nga ginpangunahan ni City Mayor Ronnie Dadivas kag Police Col. Julio Gustilo Jr.
Masubra 500 ka mga katapo sang Philippine National Police, Philippine Coast Guard, Philippine Drug Enforcement Agency (PDEA), Traffic Management Unit, Roxas City Emergency Response Team (RCERT) kag iban pa nga law enforcement unit ang magapasiguro sang kalinong kag katawhay kadungan sang nasambit nga selebrasyon.
Suno kay Asmod nga may gintukod nga Task Group Sinadya 2019 kun sa diin magaserbi nga Task Group Commander ang bag-o lamang nagpungko sa pwesto bilang provincial director sang Capiz PPO nga si Police Col. Julio Gustilo Jr.
May mga dugang man nga augmentation agud magpasiguro sang kalinong kag katawhay sa nasambit nga selebrasyon.
Ang mga kapulisan ang magapasiguro sang seguridad, peace and order kag magaresponde kun may magluntad nga mga emerhensiya.
Pahamtangan man sang mga kapulisan ang pila ka mga strategic areas kag mga lugar nga pagahiwatan sang mga aktibidad sa diin ginalauman nga magadugok ang madamo nga mga tawo.
Ginpasiguro man sang opisyal nga naka-alerto ang mga kapulisan sa probinsiya agud mapabilin ang kalinong sa nasambit nga selebrasyon.
Ang Sinadya 2019 ang natalana sa humalin Disyembre 3-9, 2019.
Target sang hanay sang pulisya nga wala sang may mapagkit nga Sinadya 2019 related incident.
